Selebrasyon Timoun ki Ekselan pandan Peryòd
ane 2023 - 2024 la
PRIM OHO, yon bèl aktivite ki te mete anplas pa Hotspot One Organization, yon gwoup ki baze nan komin Kafou, te remèt prim espesyal pou timoun ki reyalize bèl mwayen nan lekòl yo pandan peryòd Nwèl la. Aktivite sa a se te yon pati nan yon gwo pwojè ki vize ede 15 timoun ak peye lekòl yo. Nan mitan 15 timoun sa yo, 3 te soti venkè pou ekselans yo e resevwa rekonesans espesyal.
Premye Plas:
Loudschar Serum
Loudschar Serum, ki se elèv nan Collège Christophe nan Pòtoprens, pran premye plas la. Li reyalize yon bèl mwayen 38,37 sou 40. Ak ekselans li nan etid yo, li merite yon prim 7,500 goud. Se yon gwo siksè pou Loudschar ki montre kijan travay di ak disiplin ka pote gwo rekonpans. Felisitasyon pou li!
Dezyèm Plas:
Jean Estrella Rosa
Jean Estrella Rosa, ki reprezante Institution Mixte Frère Degand, rive nan dezyèm plas. Li reyalize yon bèl mwayen 31,87 sou 40. Li resevwa yon prim 5,000 goud pou bèl mwayen li reyalize nan lekòl li. Jean Estrella se yon egzanp pou kamarad li yo ak tout kominote lekòl li. Bravo pou li ak efò li yo!
Twazyèm Plas:
Markus Sébastien Antoine
Twazyèm plas la tounen Markus Sébastien Antoine, yon elèv nan École Notre Dame de l’Assomption. Li reyalize yon bèl mwayen 31,05 sou 40. Li resevwa yon prim 2,500 goud pou travay di li ak angajman li nan lekòl. Markus montre ke chak timoun gen kapasite pou briye si yo dedye tan ak enèji nan sa yo ap fè.
Ankadreman ak Enspirasyon
Sa se pa yon viktwa sèlman pou timoun sa yo, men tou pou paran yo, pwofesè yo, ak kominote yo ki t’ap sipòte yo pandan tout ane a. Prim sa yo pa sèlman yon rekonpans pou bèl mwayen, men yon envitasyon pou tout elèv travay di e kontinye kwè nan potansyèl yo.
Nou swete tout timoun yo yon kontinyasyon ekselan nan edikasyon yo e ankouraje tout timoun pou yo kontinye chache ekselans. Kè kontan, bòn travay, e bòn Nwèl pou tout moun!